Страница 1 из 11
Архив - только для чтения
Қауымдастық » Жәшік » Мұрағат » Асылхан ТӨЛЕПОВ, актер, «Жаужүрек Мың бала» (Асылхан ТӨЛЕПОВ, актер, «Жаужүрек Мың бала»)
Асылхан ТӨЛЕПОВ, актер, «Жаужүрек Мың бала»
admin
Дата: Дүйсембі, 30-07-2012, 17:55 | Сообщение # 1
Admin
Группа: Сайт басшылығы
Сообщений: 44
Репутация: 2
Асылхан ТӨЛЕПОВ, актер, «Жаужүрек Мың бала» фильмінің бас кейіпкері: Қайда жүрсем де, қарапайым болғым келеді


«Жаужүрек Мың бала» фильмінде басты тұлға Сартайдың рөлін сомдаған Асылхан Төлепов аз уақыттың ішінде қазақ жұртына танылып үлгерді. Қазақ киносының жарқ етіп шыққан жаңа кейіпкерлеріне дүйім халық «Ақан Сатаевтың алтын қырандары» деген атақ та беріп үлгеріпті. Фильмнің бас кейіпкері өзі жайлы былай ой толғайды.

ОРЫНДАЛҒАН АРМАН
- Мен Ақтөбе топырағында дүниеге келгенмін. 1996 жылы Алматыға көшіп келіп, өмірім осы алып шаһардың қым-қуыт тірлігімен біте қайнасып кетті. Өнерге кішкентайымнан жақын өстім. Мектеп қабырғасында жүргенімде әдеби кештерге, түрлі мәдени шараларға атсалысып жүретінмін. Әсіресе, әсем әнге қатты елтетінмін. Әлі есімде, мектепте «Superstar.kz» атты ән байқауы болған. Ерінбей-жалықпай соған да қатыстым. Қарап отырсаңыз, мұның барлығы да менің өнерге жақындай түсуіме, осы үлкен жолды таңдауыма түрткі болды. Сондай-ақ спортқа көп көңіл бөлдім. Таэквондомен жеті жыл шұғылданып, халықаралық деңгейдегі байқауларда да бақ сынап көргенмін. Қазіргі күні қара белбеу иегерімін. 2008 жылы М.Дулатов атындағы мектептің 9-сыныбын ойдағыдай тәмамдаған соң, Т.Жүргенов атындағы Қазақ Ұлттық өнер академиясының колледжіне, актер бөліміне қабылдандым. Колледж қабырғасында Аянмен таныстым. Ол екеуміз бірден тіл табысып, дос болып кеттік. Бір фильмге түсіп, онда бір-біріне тіреу болатын достардың рөлін сомдау - Аян екеумізден баяғыдан келе жатқан ізгі арманымыз еді. «Жақсы сөз - жарым ырыс» демекші, «бұйыртса, ол күн де туар» деп болашаққа үлкен үмітпен қарайтынбыз. Сол ниетіміз, таза достық тілегімізді Алла қабыл етіп, «Жаужүрек Мың бала» сынды үлкен фильмде хас батырлардың, намысты достардың рөлін сомдауға мүмкіндік алдық. Сол үшін сансыз шүкірлік етеміз! Екеуміздің бір фильмге түсуімізді, тағдырдың үлкен сыйы деп білемін. Сондай-ақ фильмге туған ағам - Артур да түсті. Ол Ілиястың рөлін ойнады. Біздің бұл рөлдерге бекітілуімізге қатысты да түрлі пікірлер айтылып жатыр. «Тамыр-таныстығының арқасында басты рөлді иемденіп алды» деп ойлаған біреулер мені «бір дөкейдің баласы» деп жазыпты ғаламторда. Бірақ мен қарапайым ғана отбасынан шыққанмын. Анам үй шаруашылығымен айналысады, ал әкемнің шағын ғана кәсібі бар.

АҚТАЛҒАН ҮМІТ
Ол кезде үшінші курста оқитынмын. «Мың бала» фильміне кастинг жарияланғанынан хабардар едім. Сондай-ақ ол тұста Сартайдың рөліне ең басты үміткер - Аян болатын. Бір күні мен де бағымды сынап көрейін деп кастинг өтіп жатқан кабинетке кіріп шықтым. Бірақ ол кезде менде басты рөлге өтем деген ой болған жоқ. Сол фильмнің эпизодынан көрінудің өзін үлкен бақыт деп есептейтінмін. Бірнеше күннен кейін Жайна Әбдиева хабарласып, киностудияға шақырды. Батырдың киімін кигізіп, суретке түсірді. Басты рөлдердің біріне үміткер екенімді естіген соң, шындап көңіл бөле бастадым. Алайда шешуші сәтте қатты ауырып қалдым. Ауырып тұрғаныма қарамастан, киностудияға бардым. Сол күні Ақан ағаның өзі де болды. Даусым шықпай, қырылдап әрең сөйлеп тұрмын. Ақан аға: «Тамағың қатты ауырып тұр ма? Мүлдем сөйлей алмайсың ба?» деп сұрады. Содан соң «Кішкентай ғана мәтін берем, соны оқып шықшы» деді. Қырылдап, сырылдап жазылған дүниені оқып бердім. Ешкім ештеңе айтқан жоқ. Режиссердің қағазға бірдеме деп жазып жатқанын білемін, әйтеуір. Салым суға кетіп, кабинеттен еңсем түсіп шықтым. Менің көңіл күйімнің құрдымға кеткенін көріп, Аян да қатты алаңдады. «Қойшы, көңіл-күйіңді түсірме! Көр де тұр, алады сені» деп жұбатып жатыр. Бірақ мен алмайтынына өзімді әбден сендіріп алған едім ол кезде. Үмітімді үзілдіге балап жүргенімде тағы да шақырту алдым. Аян екеуміз де бардық. Содан Ақан аға: «Екеулерің дос екенсіңдер. Ертең біреуің өтіп, бірің өтпей қалсаңдар, ренжімейсіңдер ме?» деп сұрады. «Бізде ондай қызғаныш, көреалмаушылық жоқ. Осындай фильмге тым болмаса, біреуіміз өтсек, соның өзі біз үшін үлкен жеңіс» дедім. Ақан аға бұл жауапқа риза болды. Сол кезде есіме ағам түсіп кетіп: «Ақан аға, айтпақшы, менің ағам бар, мықты актер. Намаз оқитын бала, Ілиястың тұлғасына дәл келеді» дедім. Аға рұқсатын берді. Содан мені - Сартайдың, Аянды - Таймастың, Артурды - Ілиястың рөліне бекітті. Солайша, ағам, досым үшеуміз бір фильмде ойнайтын болдық. Мұның барлығы да құдіреті күшті Алланың бұйрығымен болды.
Басты рөлдерге бекітілгенімізді естігенде Аян екеуміздің де қуанышымызда шек болмады. Біздің арамызда ешқандай да қызғаныш, алауыздық болған емес және ешқашан да болмай-ақ қойсын. Аян - өте талантты жігіт. Өзінің сазгерлігі де бар. Бірнеше аспап тілін меңгерген. Бәрін де ешқандай оқу-тоқусыз өзі үйреніп алған. Әнді бір рет тыңдап-ақ, кез келген аспапқа ноталарын айнытпай салып бере алады. Мен оның есте сақтау қабілетіне таңғаламын.

«ӨРІМТАЛ ЕЛІ ҮШІН ЖАНЫН ҚИҒАН» - САРТАЙ БАТЫР



Мен бұған дейін «Балалық шағымның аспаны» атты Елбасына арналған фильмге түскенмін. Онда Президенттің жас кезіндегі жолдасы Қалидің рөлін сомдадым. Шағын рөл болса да ондай фильмге түсу, мен үшін үлкен бақыт және ол фильм өз кезегінде мен үшін үлкен шеберлік алаңы болды. Содан кейін осы «Мың балаға» түстім. Әрине, алғашқыда жүрексінесің. Бірақ белді бекем буып, рөлдің жақсы шығуы үшін тырысып бақтым. Кітапханаға барып, Сартай бабамыз туралы деректер іздестірдім. Нұрмағанбет Қосжанұлының «Сартай батыр» атты үлкен дастанын оқыдым. Негізі, мың баланы бастап, жауға шапқан Сартай батыр жас кезінде қол бастаса, кейін би атанған қарттық жасқа жетіп қайтыс болған бабамыз екен. Сол соғыста мың баланың бес жүзі шейіт болған деседі. Ол жайында Нұрмағанбет Қосжанұлы: «Өрімтал елі үшін жанын қиған, Жаратқан өздеріне берсін иман» деп жырлайды. Бұл ізденісім маған тың серпін берді, мойныма артылған жүктің жеңілдеуіне көмектесті.
Мен барлық сұхбатымда: «Құдай сақтасын, егер қазағымның басына күн туса, дәл Сартай бабам секілді елімнің елдігі мен егемендігін қорғауға бармын» деп айтып жүрмін. Мен бұл рөлден рухтандым, мақтандым! Батырларымыздың ерлігіне тамсандым, таңғалдым. Соғыс кезеңінің иісін сезіндім. Бұл фильм үлкен тәрбие мектебі болды. Сондай-ақ бауыр таптым, дос таптым. Сондықтан да түсірілім барысында еш қиындық болған жоқ. Барлығымыз бірге, ұйымдасып, ақылдасып жұмыс істедік. Сондай-ақ қандай бір қиындықты еңсеріп кетуімізге Ақан ағаның көп көмегі тиді. Ол кісі ешқашан ұрыспайды, айқайламайды. Әдеттегі қатал режиссер емес. Бәріне түсіністікпен қарайды және өте байсалды жан. Рөлді ойдағыдай шығара алмай жатсақ, бізге сол образдың қандай болуы керектігін аспай-саспай, жақсылап түсіндіріп береді. Фильм сол кісінің шеберлігінің арқасында сәтті шықты деп ойлаймын өз басым.
Негізі, кедергі атаулы киноға түспес бұрын болды. Дәл түсірілім басталатын кезде, колледжде студенттер диплом қорғап жатты. Оқу орнының тарапынан бізге «не оқуды, не киноны таңдасын» деген қатал талап қойылды. Аян екеуміздің оқуымыз ақылы еді. Табаны күректей төрт жыл оқып, тастап кетсең, обал емес пе?! Шыны керек, осы оқудың ақшасын төлеу үшін базарда да жұмыс істедім. Ал әкемнің қанша маңдай тері төгілді десеңізші? Аян екеуміз де осындай қысылтаяң жағдайда қалдық. Тәтті еңбектің табысты төрт жылын қалай қиып кетерімізді білмедік?! Бірақ сол кездегі қиын жағдайдан бізді ұстазымыз Есім Сегізбаев құтқарып кетті. Ол кісі: «Бақтарыңды байламаймын, істерің сәтті болсын!» деп ақ батасын беріп, диплом жұмысынан босатты. Ұлағатты ұстазымызға сол үшін қарыздармыз. Бұйыртса, осымен тоқтап қалмай, әлі де тынбай еңбектеніп, ұстазымыз артқан үмітті ақтауға тырысамыз.

АЛЫПТАРДЫҢ АҚ БАТАСЫ
Үлкен тұсаукесерде қатты қобалжыдым. «Өнердің нағыз майталмандары біздің еңбегімізге қандай баға береді екен?» деген сауал көкейімнен кетпеді. Фильм біткенде жанарыма жас бұрқ ете қалды. Ермек Аманшаев, Ақан ағалар, басқа да таныстарым, достарым келіп құттықтап жатыр. Көңілім босап, толқып отырғанымда Нұржұман аға келіп құттықтап, ақ батасын берді. Бір кезде өзім жақсы көретін ақын Мұхтар Шахановтың даусын естідім. «Сартай қайда? Сартайжан, құтты болсын, жарайсың!» деп келіп, бетімнен сүйді ол кісі. Сол кезде менен бақытты адам болған жоқ шығар, сірә. Өнер майталмандарынан естіген алғысты қалың елім қазағымнан, қарапайым халықтан да естіп жатырмыз. Халқыма рақмет!
Фильмді тамашалауға жан-жақтан туыстарым да келді. Бәрі де риза болды. Екі ұлын бір фильмнен көрген ананың жүрегі елжіремей тұра ма? Бәрі үшін де фильм жарыққа шыққан күн - ақ түйенің қарны жарылған ұлы тоймен тең болды.

«ӨЗ ТІЛІҢДІ БІЛМЕЙ, ӨЗГЕ ТІЛДЕ СӨЙЛЕУ - ҚАСІРЕТ»
Солай деуге де болады. Қалада өскендіктен бір адамдай орыс тілін білемін. Онда да шешен сөйлей аламын деп мақтанбаймын. Бірақ өз орысшам, өзіме жетеді. Бірақ мен үшін өз тілімде сөйлеу - маңыздырақ. Бір тудың астында, бірлікте, тату-тәтті тіршілік етіп жатырмыз. Сондықтан өзге ұлттар да қазақ тілін құрметтеуі керек емес пе?!
Мені фильм түсірілмес бұрын Мәскеуге жіберді. Онда Сартайдың жарасын жуып, емдейтін эпизодқа арнайы дене жасатты. Міне, сол жерде орыс тілінде сөйлеуіме тура келді. Бірақ бәріне түсінікті, «Сәлеметсіз бе, рақмет, жақсы, керемет, мықты» деген сөздерді қосып отырдым. Мәскеуліктерге қазақ поэзиясының алыбы Абайдың және тіл жанашыры Мұхтар Шахановтың өлеңдерін оқып бердім. Негізі, мен қай жерде жүрсем де, қазақша сөйлеуге, тілімді шұбарламауға тырысамын. Алайда қоршаған ортаң әсер етпей тұрмайды екен. Кейде орыс тілінің бір екі сөзін араластырып жатамыз. «Өз тіліңді білмей, өзге тілде сөйлеу - қасірет, өз тіліңді біліп, өзге тілде де сөйлеу - қасиет» дейді. Енді, бұйыртса, ағылшын тілін толық меңгергім келеді. Қазіргі таңда өнер академиясының алғашқы курсында оқып жүрмін. Біліктілігім мен шеберлігімді шыңдап, болашақта биіктерден көрінуді басты мақсат етіп қойдым.
Алла тәкаппарлықты ұнатпайды. Тәкаппарлық бізге жат. Сондықтан да қайда жүрсем де, қарапайым болғым келеді. Маған көпшілік осыны ескертіп, айтып жатыр. Алла оның бетін ары қылсын! Бірақ кейде қиын жағдайлар болады. Сондай бір кездерде мені жұрт түсінсе екен деймін. Мысалы, тұсаукесер болған күні сан сұрақтың астына алған журналистер қолды-аяққа тұрғызбай, біресе оңға, біресе солға сүйреп, есім шықты. Бір минутқа да босаған жоқпын. Сондай аласапыранда танитын бір досымның амандасқанын аңғармай, қолын қағып өте беріппін. Бірақ шын сөзім, мен оны байқамадым. Ертеңінде әлгі бала ренжіп, өкпесін айтты. Сол кезде қатты ыңғайсыздандым. Мен, тіпті, ол кезде қандай арнаға, қалай сұхбат бергенімді де білмеймін. Киноға түсуге дейін қандай болдым, сол қалпымдамын. Өйткені ол менің табиғатым.




sanabek
Дата: Дүйсембі, 30-07-2012, 20:13 | Сообщение # 2
Бастық
Группа: Сайт басшылығы
Сообщений: 108
Репутация: 12
admin, қаншама инфон мааа!
Zhansaya
Дата: Дүйсембі, 30-07-2012, 23:01 | Сообщение # 3
Группа: Қолданушы
Сообщений: 1190
Репутация: 7
Админ, рахмет ақпаратың үшін) biggrin
Қауымдастық » Жәшік » Мұрағат » Асылхан ТӨЛЕПОВ, актер, «Жаужүрек Мың бала» (Асылхан ТӨЛЕПОВ, актер, «Жаужүрек Мың бала»)
Страница 1 из 11
Поиск:



Сайт қолданушылары